flash player 免費下載
打印

大埔墟無頭女鬼

大埔墟無頭女鬼

前排o係 E-mail o既世界,流傳一張無頭女鬼相,拍攝地點係大埔墟火車站。照片上首先見到兩個人背對背坐o係火車站月台o既椅上,不過右邊o個位身穿長裙o既女人,竟然係冇頭o既。據放出呢張相o既人講,佢係o係趕搭晨早第一班車o既時候見到,所以即刻影低。

老實講,每個第一眼見到幅相o既人,都會直覺覺得幅相係真o既,不過越想講係就越唔相信,最後就會話張相其實係電腦合成,得啖笑。不過,大埔墟火車站已經傳出多個鬼故,而且主角都係一個著長裙o既「女性」。

Kanny 兩年前住o係大埔,每個禮拜都會有一至兩晚同班 Friend 出去九龍玩,而且仲奉旨夜返。有一次同班 Friend 去完旺角之後,照例佢都會趕尾班火車返大埔。當時已經差唔多十二點,Kanny 不嬲都揀尾卡坐,所以架車去到大埔墟已經無乜人。

出火車之後,Kanny一邊打喊露,一邊行去出口電梯。行行o下,Kanny 眼尾突然掃到有個女仔企o係月台尾,「著長裙咁斯文o既!不過冷衫都唔使著咪仲強壯過我?」 。正當Kanny o係度亂諗o野o既時候,竟然見到個女仔行o左出條黃線出面,好似想跳落去咁。Kanny 即刻轉身衝埋去個女仔度,諗住截住佢。

同一時間,個女仔轉身過o黎同 Kanny 講:「你做乜呀?」

「我以為你跳......」Kanny 答答o下,竟然見到個女仔半邊面原來血肉糢糊, 冇左手,連下半身都冇。Kanny 就咁嚇到暈o左,到醒返已經 目訓 o係醫院。醫生話佢係因為血糖過低所以暈o左,但佢就點都唔敢同人講,佢其實係因為撞鬼而嚇暈。

之後佢即刻搬o左出去九龍住,就算搭火車都唔敢再坐尾卡,更加唔敢o係大埔墟站落車

TOP